ზაალ ჯალაღონია



 
 
ნარღიშ კარე
 
ხვალე გემიდგ ნარღიშ კარე,
ფირქეფც ვაუღ შურო სვანჯი.
თოლონჭაფუს ჸურუმ გარე,
ნირსის დუფორ გვალაშ წვანჯი.
მუნაფა რე ფერო შორშე,
დუც გუმართუ მუკი–მუკი.
აკორთელე არძა შოშე,
არძა გა დო არძა სუკი.
მიკმურცხონანც ფაჭას დოლოს,
აყარებულ წყარი ნარას.
ჩეგვალა დო ვერჩეშ ხოლოს,
მიკმარზანც დო მიკმავალანც.
მითა მიჸუნც ელმაჩამალ,
ჸალ მიწყუნუ ორთაშ უღუქ.
მუკომინჯანც ორკეს ჩანარ,
ნარღიშ კარეს მულვოგუგუქ.
ათაშ ვორექ ამდღა გვალო,
უძირაფუს დევეხოლი.
შურ გოფაფჩუ ერქემცალო,
გუმაფართხალ მაჭირხოლი.
გაკწოპრტებუ არზი, ნარდი,
ფირქეფ ვამიჩქ ასე სო რენ.
ხოლო ქუქუბ ვარე ნარტი,
ჭოროფა დღას აკობგორენ.
 
 
 
 
* * *
გური ფართას ქუდოიტე,
მუკონჯამილ კარიცალო.
სინთე დღას ვაფსქირაფ
მიხვარჩალუ მალი- მალო.
გებდირთი დო ნარღეფც ვეჩი,
შურიშ კუმა ჸოფე რუმე, 
გინძე ფერდის ქათვოდირთი,
დუდი სკანო ქაწიბჯუმე.
ცას მუკობუდ შურიშ ბანდი,
მუ უწიკო ჭუაშ ლანდეფს,
მირულედეს დღალეფ თავრე
დო მუნაფეფც მიორჩანდეს.
სინთე დღას ვამობრკებუ
ვართ მიგორუ ცალი-ცალო,
გური ფართას ქუდოიტე,
ღორონთიში კარიცალო!
 
 
 
 
* * * 
სოთინ ვაორდინ თიმწკჷმა
ირფელც ვორწყედი.
ასე ქუმოფრთი დო დუდ ხოლო ვაბძირი.
გასორებული გივორექჷ.
მიდგარენ ალმორაგადანს,
,,გორჩქინა დიო ვაგასურებე,
კოჩქ დიხაუჩას ირო ოკო დებადას,
ღურა ხვალე ართშა მობძუნა,
უკულ რინა რე უგუთებუ.
ოლოლერ ტობას გინულინე თოლი,
ამსერ გემუანაშე ქუდმარულე.
ჩქიმ რშვილი ტანი, იხუაფუ ჭიე-ჭიეთ,
მინ ცას მეუღჷ, მინ მურიცხის.
გორგალ მიდგარენც უკინებჷ თიში,
მეურც დო გითმიორთანც.
საბაკელი შარას გეძჷ ძაფიშ ნოსოფეფი,
მეშარე გამკურც დო თის ართიანს ქიმურსხუანც.
თენა ხოლო ახალ რინა იჸუაფჷ.
დაბადება გიდვინე დო გორჩქინა კინ თიშე,
მუდგაქ მუკოისურუნი.
შურ კუმელცალო ეშმოლუ, დო
არძა დღა, არძა თუთა დო წანა
ქაწომრინუ თოლიშ წოხლე.
მის მუ უფირქებჷ გურიშ ინოხ დო
მუს იფირქენც ანწი ხოლონი.
ოფირჩა უგუთებუ რე დო კოჩიშ
სისმარ დო ცხად ხოლო უგუთებჷ რე
ირიათონს მიშაშილი.
შაშილ მაფუ გური სქან ჩილამურით
დო მინშა ბწილოხუ,
სქან თოლიშ ბჟათ ხოლო თის ვოსქირუა.
ართბორჯულო ვორეთ არძა დო
გური ქუგუჩით-და
ოშა-გოშათ მუკოფრჩქინდუთ.
ოლოლერ ტობას გინულინე თოლი,
ამსერ გემუანაშე ქუდმარულე.
ვაგგოჭყორდას:
ულირსჷთ დო მუმალცჷთ
ირფელ გაშინალ აჸინა.
 
 
* * *
თუთაქ მიწუ კაკანიაქ,
შხვა დომგორით აკანია.
აქ მუნაფა აწმაფეფუ,
კურტიშა დო აფანია.
თუთაქ მიწუ კაკანიაქ,
შხვადო მოკო აკანია.
მა ტაცალეს ირფელჲ მორწყე:
წყარჲ, გვალა დო ჭორილ ჭველა,
ქობძირი დო თოლეფჲ გონწყი,
ჩქიმო ვა რე ნორჩალჲ, კველა.
ანწჲ სი ქოთქვი, თე ცაშ ოზეს
თაშ მუზმახანს გიბკერკელა.
 
 
 
· 
* * *
ჭვენც, ჭვენც გუმანტირეთ,
რინას მიშა გუათირეთ.
მუს ქაკონდა, ჭვემათ იპით,
ქილამუდა, გუათირეთ.
ქომობრთით დო კინე ურთუ,
დუდი მერქას მუკვოძირეთ.
გინმობჩირთუთ წირეს არძა
დო გუართუთ კინე წირეს.
ჩქინი არძა ხიოლ, ჭუა,
ობჟალესჷ ეკიბიბრეთ,
რინა აშო ბკიბირანა,
მარა ვიშო ვებკიბირეთ.
ბრელ ოწონდე გუონჯით დო,
ხოლო უმოს ეკიბკილეთ.
მურიცხეფი ნორცხვა, ნორცხვა,
ცას გილუღუ კილე- კილეთ.
მუს ქაკონდა ჭვემათ იპით,
ქილამუდა, გუათირეთ.
ჭვენც , ჭვენც გუმანტირეთ,
რინას მიშა გუათირეთ?!